Shqip / English

Automobilistët e Kosovës me paraqitje shumë të mirë në Kroaci

    

Pjesëmarrja e ekspeditës së Federatës së Auto Sportit të Kosovës në garën që u zhvillua në Zagreb ka kaluar shumë mirë.

Që nga arritja në kryeqytetin kroat e deri në përfundim të garës është treguar nivel i lartë i bashkëpunimit me mikpritësit, pastaj disiplina dhe angazhimi maksimal i garuesve tanë kanë bërë që nikoqirët të befasohen me mysafirët nga Kosova.

Ismail Smani, Bardhyl Canolli, Valdet Krasniqi, Përparim Dushi, Naim Dashaj, Besfort Bunjaku dhe Liridon Kalenderi (ky i fundit në kategorinë karting) dëshmuan para kolegëve të tyre kroatë se janë garues tejet cilësorë dhe se me sukses mund të ballafaqohen me rivalët nga vendet tjera.

Edhe më e rëndësishme se paraqitja në garë ishte bashkëpunimi i jashtëzakonshëm dhe gatishmëria e mikpritësve për të ndihmuar në çdo aspekt të mundshëm. Presidenti i FIA CEZ (Zona e Evropës Qendrore) Zrinko Gregurek pati takime miqësore me presidentin e Federatës së Auto Sportit të Kosovës, Ismet Rexhepin, me të cilin janë dakorduar që edhe në të ardhmen të bashkëpunohet, madje në nivel edhe më të lartë.

Zrinko së bashku me një delegacion prej pesë anëtarësh së shpejti do të jetë mysafir i FASK-së me ç’rast do të ketë edhe seminare të rëndësishme për zyrtarët e Federatës sonë, njofotn kumtesa nga kjo Federatë.

Po ashtu edhe anëtarët tjerë të FASK-së kanë bashkëpunuar ngushtë me homologët e tyre kroatë, nga të cilët kanë fituar përvojë të rëndësishme. Ajo që binte në sy gjatë gjithë garës ishte fakti që për çdo paraqitje të garuesve tanë, spikeri zyrtar theksonte se në shteg është njëri prej mysafirëve nga Republika e Kosovës, ndërsa të pranishmit e përcillnin me duartrokitje të vazhdueshme. Si rezultat i këtij aktiviteti, i cili nga të gjithë pjesëmarrësit u vlerësua shumë pozitivisht, kroatët menjëherë e shprehën gatishmërinë që garuesit tanë të marrin pjesë edhe në gara të tjera, ndërsa po u deklaruan të gatshëm që edhe ata të vijnë në Kosovë.

 

Template Design Ext-joom.com